Hyang Yesus Nyegerin Anak Sungkan ring Telaga Betesda
5
Sasampune punika,
Hyang Yesus luas ka Kota Yerusalem jagi sareng marainan rarainan anak Yahudine.
2 Ring Yerusalem,
nampek pamedal kotane sane kasambat Kori Biri-biri wenten telaga.
Ring basa Ibrani,
telagane punika kasambat Telaga Betesda.
Ring sisin telagane wenten amben lalima.
3 Ring sebilang ambene,
wenten akeh anak sungkan sane mebahan irika:
wenten anak sane sungkan buta,
perot,
lan lumpuh.
[Ipun sami sedek nyantosang toyan telagane nglencok.
4 Di sagete,
malekat Sang Hyang Tunggal tedun raris nglencokin toyan telagane.
Irika anake sungkan sane macemplung paling simalu dados seger napi ja penyakitnyane.a]
5 Irika wenten adiri anak lanang sane sampun telung dasa kutus (38) tiban suene sungkan lumpuh.
6 Hyang Yesus nyingakin anake lumpuh punika,
tur Ida uning ipun sampun sue sungkan.
Irika Ida ngandika sapuniki,
“Kayun ke jerone seger?”
7 Raris anake lumpuh punika matur sapuniki,
“Ratu,
nenten wenten anak sane nedunang titiang ka telagane tatkala toyane nglencok.
Turmaning,
tatkala titiang nuju telagane duk toyane nglencok,
anak lianan sampun ngamalunin titiang.”
8 Raris Hyang Yesus ngandika sapuniki,
“Matangi ja!
Tinting tikeh jerone,
lan mamargi.”
9 Jeg saget anake lumpuh punika seger;
ipun ninting tikehnyane tur mamargi.
Duk punika rahina Sabatb.
10 Punika mawinan,
para pemimpin Yahudine mabaos kapining anake sane sampun seger punika sapuniki,
“Dinane mangkin rahina Sabat.
Manut awig-awig iragane,
nenten dados ragane ninting tikeh.”
11 Nanging anake sane sampun seger punika masaur sapuniki,
“Anak sane nyegerin titiang nikain titiang mangda ninting tikeh titiange tur mamargi.”
12 Para pemimpine punika mataken sapuniki,
“Sirake anake sane nikain ragane mangda ninting tikeh ragane tur majalan?”
13 Nanging anake punika nenten uning sira sane nyegerin ipun krana akeh wenten anak irika tur Hyang Yesus sampun matilar.
14 Sasampune paindikane punika,
Hyang Yesus malih matemu sareng anak sane sampun seger punika ring Genah Agung Mabakti kapining Sang Hyang Pengardi.
Ida ngandika kapining anake punika sapuniki,
“Mangkin jerone sampun seger.
Sampunang ja malaksana dosa malih mangda jerone nenten keni sengkala sane agengan.”
15 Irika raris anake punika luas ring para pemimpin Yahudine tur nyeritayang indik Hyang Yesus sane nyegerin ipun.
16 Sane mangkin,
para pemimpin Yahudine ngutsahayang nyengkalen Hyang Yesus duaning Ida nyegerin anak ring rahina Sabat.
17 Nanging Hyang Yesus ngandika kapining ipun sami sapuniki,
“Ajin Tiange setata makarya kantos mangkin,
lan Tiang pada makarya sekadi Ida.”
18 Pengandikan Hyang Yesuse sekadi punika ngranayang para pemimpin Yahudine ngancan ngutsahayang ngamademang Ida.
Ipun sami malaksana sekadi punika nenten ja krana Hyang Yesus nglanggar ukum rahina Sabat kamanten,
nanging krana Ida taler ngandika Sang Hyang Pengardi dados Ajin Idane.
Artine Ida matehang ragan Idane sareng Sang Hyang Pengardi.
Kasaksian Hyang Yesus indik Ragan Idane
19 Raris Hyang Yesus ngandika kapining ipun sami sapuniki,
“Tiang ngandikayang sane patut,
sujatine Sang Putra nenten prasida makarya napi-napi manut pikayunan Idane praragan.
Ida wantah makarya napi sane cingakin Ida saking Ajin Idane.
Duaning napi sane kakaryanin olih Sang Hyang Aji,
taler kakaryanin olih Sang Putra.
20 Sang Hyang Aji tresna kapining Sang Putra lan ngedengang kapining Sang Putra saluirin sane kakaryanin Ida praragan.
Turmaning Ida jagi ngedengang kapining Sang Putra paindikan-paindikan sane agengan malih,
kantos jerone sami ngon.
21 Sang Hyang Aji mangunang anak sane sampun padem tur ngicen ipun urip.
Kenten pada Sang Putra micayang urip kapining sapa sira ja manut pikayunan Idane.
22 Krana Sang Hyang Aji nenten ngakimin sapa sira ja,
nanging makasami kuasa buat ngakimin sampun kaserahang kapining Sang Putra.
23 Sang Hyang Aji malaksana sekadi punika mangda makasami anake ngajiang Sang Putra,
pateh sekadi ipun ngajiang Sang Hyang Aji.
Anake sane nenten ngajiang Sang Putra,
ipun pada nenten ngajiang Sang Hyang Aji sane ngutus Sang Putra.
24 “Tiang ngandikayang sane patut,
sujatine makasami anake sane mirengin baos Tiange lan pracaya kapining Ida sane ngutus Tiang,
ipun madue urip sujati salamin-laminne.
Ipun nenten kaukum;
ipun sampun makisid saking genah anake padem ka genah anake urip.
25 Tiang ngandikayang sane patut,
sujatine jagi rauh galahe,
tur mangkin galahe punika sampun ngawitin:
anake sane kaucap padem jagi mirengin suaran Putran Sang Hyang Pengardi.
Tur anake sane mirengin suarane punika jagi maurip.
26 Pateh sekadi Sang Hyang Aji praragan sumber urip,
kenten pada Ida sane nadosang Sang Putra sumber urip.
27 Ida sampun ngicen ring Sang Putra hak mangda ngakimin,
krana Putrane punika nenten tios Sang Putraning Manusa.
28 Sampunang ja jerone ngon mirengin paindikane puniki,
krana jagi rauh galahe tatkala makasami anake sane sampun pademc mirengin suaran Sang Putraning Manusa.
29 Anake sane malaksana becik jagi kauripang malih saking anake padem buat nerima urip salamin-laminne.
Nanging anake sane malaksana jaat jagi kauripang malih buat katiben ukuman salamin-laminne.
30 “Tiang nenten sida makarya napi-napi manut pikayunan Tiange praragan.
Tiang ngakimin manut sane pirengin Tiang saking Sang Hyang Aji.
Pastika pengakiman Tiange adil krana Tiang nenten ja ninutin pikayunan Tiange praragan,
nanging pikayunan Sang Hyang Aji sane ngutus Tiang.”
Kasaksian Hyang Yesus kapining Para Pemimpin Yahudine
31 Raris Hyang Yesus malih ngandika sapuniki,
“Yening Tiang praragan ngicen kasaksian indik Ragan Tiange,
kasaksian Tiange punika nenten ja sah.
32 Nanging wenten saksi sane lianan,
inggih punika Ajin Tiange.
Ida sane ngicen kasaksian indik Tiang,
tur Tiang uning kasaksian Idane patut.
33 “Kenten pada dane Yohanesd Sang Penglukat sampun ngicen kasaksian sane patut indik Tiang,
ritatkala jerone sami ngutus anak mangda mataken sid danene.
34 Tiang nenten ja ngamerluang kasaksian saking manusa.
Nanging Tiang nikayang paindikane punika mangdane jerone prasida karahayuang.
35 Dane Yohanes punika sekadi lampu sane ngendih tur masinar.
Jerone wantah ajebos pisan misadya nerima galange punika antuk manah sane seneng.
36 “Nanging Tiang madue kasaksian sane lebih utama bandingang kapining kasaksian dane Yohanese,
inggih punika pakaryan sane kapicayang olih Sang Hyang Aji mangda puputang Tiang.
Pakaryane sane karyanin Tiang mangkin dados bukti Tiang kautus olih Ajin Tiange.
37 Ida sane ngutus Tiang pada ngicen kasaksian indik Tiang.
Jerone sami nenten taen mirengin suaran Ida wiadin nyingak prarain Idane.
38 Sabdan Idane nenten kasimpen ring manah jerone,
krana jerone nenten pracaya kapining Tiang sane kautus olih Ida.
39 Jerone malajahin Cakepan Suci krana ngaden paindikane punika prasida ngamolihang urip sujati salamin-laminne.
Sujatine Cakepan Sucine punika ngicen kasaksian indik Tiang.
40 Nanging jerone nenten kayun rauh sid Tiange mangda ngamolihang urip salamin-laminne.
41 “Tiang nenten ja ngrereh mangda kaajiang olih manusa.
42 Nanging Tiang uning yening jerone sami nenten nresnain Sang Hyang Pengardi ring manah jerone.
43 Tiang rauh antuk kuasan Ajin Tiange,
tur jerone nenten nerima Tiang.
Nanging yening anak lianan rauh antuk kuasan deweknyane praragan,
jerone nerima ipun.
44 Jerone meled kaajiang olih sasaman jerone,
nanging nenten ngutsahayang mangda kaajiang olih Sang Hyang Pengardi sane Tunggal punika.
Yening kenten,
punapiangke jerone prasida pracaya kapining Tiang?
45 “Sampunang ja jerone sami ngaden Tiang jagi nuduh jerone ring arepan Sang Hyang Aji.
Sujatine sane nuduh jerone nenten tios dane Musa,
yadiastun jerone nyantosang dane sane ngilonin jerone.
46 Yening jerone pracaya kapining dane Musa,
pastika jerone jagi pracaya kapining Tiang,
krana dane Musa nulis indik Tiang.
47 Nanging jerone nenten yakti pracaya kapining sane katulis olih dane Musa.
Punika mawinan jerone nenten mresidayang pracaya kapining baos Tiange.”